MAKUTANO YA TAI na JAMES KALEKWA.

PASAKA WA PILI NI UREJESHO WA KUSUDI KUU LA KWANZA LA UFALME WA MUNGU.

 

SEHEMU YA 3

 

Mchakato wa dhabihu ya Pasaka (The process)

Damu ya mwanakondoo ilipakwa kwenye miimo ya milango; na nyama (mwili) ya mwanakondoo ililiwa na kila mwanafamilia (Kutoka 12:7-8). Nyama ya mwanakondoo ililiwa yote na hakuna hata kipande kilipaswa kusazwa… Kumbuka damu na nyama (mwili) wa mwanakondoo ndiyo vilihusika katika kufunika nyumba/wanafamilia! Damu na mwili!!!

Kwanini damu ya Pasaka? (Kutoka 12:13)

      Ishara kwenu

      Ishara kwangu

Ishara kwenu: maana yake ni kwamba, damu ilikuwa na kazi ya kuwapa uhakika/uthibitisho ya kwamba mmo ndani ya uhusiano na Yehova, kwahiyo hamuhitaji kwenda mahala pengine kutafuta uhusiano na usalama. Kwa damu hiyo ya Pasaka pekee mnapaswa kutulia ndani kwani Yehova yuko kazini.

Maana nyingine ni kwamba hii ni ishara ya kwamba ninyi nyote mzungukwao na damu ya dhabihu ya Pasaka ni familia, ni kundi moja! Hebu jaribu kutengeneza picha katika fikra zako (imagination) pale unapochungulia dirishani ama utokapo nje na kisha kuona nyumba ya jirani nayo ina damu kwenye miimo yake kama ilivyo yako… Naamini utasema “aah, kumbe naye ni mwenzangu”. Hivyo utaelewa kwamba jirani yako amepata maelekezo sawa sawa na yale uliyoyapata wewe vilevile utagundua ya kwamba jirani yako ni mtiifu kama ulivyo wewe- Haleluya!!!

Hivyo, uhusiano anaouanzisha Mungu si wa siri… Anauweka wazi kupitia alama (ishara) ya damu. Ishara (sign) si kitu halisi bali huwakilisha kitu fulani kingine. Kwahiyo damu si kitu halisi cha mwisho (not the end result), bali kuna jambo kubwa zaidi ya damu. Yaani kuna kitu kingine kikubwa ambacho kinawakilishwa na ishara ya damu…. Damu ilikuwa na kazi maalum ya kuwakilisha agano/makubaliano/mkataba ya kwamba “Ninawalinda katikati ya uangamivu huu kwasababu ninataka uhusiano (fellowship) na ninyi.”! Umeelewa kitu ulichokisoma? Ni hivi, damu siyo Hitimisho bali ni ishara na ishara huwakilisha kitu kingine. Kwahiyo, hupaswi kuyaelekeza macho yako kwenye damu tu bali kwenye ujumbe unaobebwa na damu… Kwahiyo, damu ya Pasaka ilikuwepo kuwalinda waIsraeli ili wawe huru kutoka kwa wamisri kisha wapate nafasi ya kuanzisha mahusiano/ushirika wa kudumu na Yehova! Mungu, Roho Mtakatifu, akusaidie uone kwa namna hiyo!

Ishara kwangu Kutoka 12:13b, “…nami nitakapoiona ile damu….”… Hii maana yake ni kwamba damu ya kwenye miimo inazungumza kwa niaba ya waliomo ndani. Damu ni mwakilishi/wakili wa wote inaowafunika! Hawakuhitaji kutoka nje ya nyumba zao na kusema maneno mbele ya malaika wa kifo ili kumshawishi asifanye uangamivu juu ya nyumba yao, bali damu ilizungumza na malaika kwa niaba yao! Kwa maneno mengine, damu ilisema na Mungu kwa niaba ya watu… Hebu niruhusu nikutazamishe maeneo (aspects) ya uwakilishi wa damu:

ü  Kwasababu wamisri wamekataa kutoa ruhusa ya uhusiano kati ya Mungu na taifa lake, nchi nzima inapokea pigo… Sasa, kazi ya damu ni ni kunena na kuziambia mbingu ya kwamba, “waliomo ndani ya nyumba hii tuna uhusiano nao….  Passover, Passover…”.  Malaika wa kifo ikabidi apite bila kufanya uangamivu !

ü  Vilevile damu ina kazi ya utambulisho na uwakilishi – ni kama vile damu inawakilisha/inasema “hapa amechinjwa Pasaka…”

Kwahiyo kupitia damu hii ya Pasaka Mungu aliwanunua waisraeli kutoka Misri si tu ili awapeleke Kanani, nchi ya ahadi, bali ili ajenge uhusiano nao. Na ndiyo maana hakuwapeleka Kanani moja kwa moja bali aliwapitisha jangwani miaka arobaini ili kuujenga uhusiano. Ni muhimu sana hii dhana uikumbuke kwenye maisha yako yote ya kwamba Mungu hakuwa anatafuta watu wa kuijaza au kuikalia nchi ya Kanaani kwasababu walikuwapo wakaazi katika nchi hiyo. Wala hakuwa anatafuta kitu kingine chochote  isipokuwa MAHUSIANO/USHIRIKA! Ndiyo kusema usuli (essence) wa sadaka ya Pasaka ni Mungu kutaka kuwa na mahusiano kati yake na watu wake- JAMBO HILO HALIJABADILIKA HATA SASA!

Ufalme wa Mungu ni nini?

Soma kitabu cha Mwanzo sura ya 1 na ya 2

Utaona Mungu alifanya uumbaji wa dunia na vitu vyote vilivyo ndani yake kwa utashi wake mwenyewe, bila kushauriwa, kuombwa ama kulazimishwa na yeyote yule. Aliumba kwa utashi na mapenzi yake mwenyewe na kwakusudi lake mwenyewe.

Baada ya kufanya shughuli kubwa ya uumbaji wa dunia na kila kitu kilichomo ndani yake kiijazacho dunia kwa muda wa siku tano kwa njia/malighafi (raw material) ya neno la kinywa chake, siku ya sita anaamua kufanya uumbaji kwa kutumia mikono yake. Baada ya kuumba kwa siku sita anaamua kutoa maelekezo kwa kiumbe chake cha mwisho na maelekezo hayo ni kutawala… Hakuna aliyemshauri, aliyemuomba wala kumlazimisha Mungu bali aligawa utawala kwa wanadamu kwa utashi wake mwenyewe. Kutawala (rule) ni neno la kifalme na si la kidemokrasia! Kwahiyo basi, Mungu anaamua kuyagawa baadhi ya madaraka yake ya kutawala kile alichokiumba… anaamua kuyagawa kwa mwanadamu! Anaamua kugawa kiasi cha madaraka yake juu ya uumbaji wake kwa mwanadamu. Mungu hakuwa anaanzisha utawala wake bali alikuwa anafanya mwendelezo (extension) wa utawala wake… Hii itakupa kusoma habari ya Mwanzo na uumbaji kwa jicho la tofauti kabisa! Ninamaanisha, kila Ukisoma na kuona jinsi mambo yalivyoanza, nakushauri usijisahau na kudhani kuwa na Mungu naye ndiyo alikuwa anaanza- HAPANA! Alikuwepo kabla ya Mwanzo sura ya kwanza!

Mungu aliuumba ulimwengu kwa mifumo miwili: ulimwengu wa mwili na ulimwengu wa roho (Rejea kitabu changu Wokovu ni Uhakika wa Maisha ya sasa na ya Baadaye ):

·         Ulimwengu wa mwili huongozwa kwa mwili wakati ulimwengu wa roho huongozwa kwa roho

·         Ulimwengu wa mwili huwasiliana kwa mwili wakati ulimwengu wa roho huwasiliana kwa roho.

·         Ulimwengu wa mwili una mwanzo na mwisho (ni wa muda) wakati ulimwengu wa roho hauna mwanzo wala hautakuwa na mwisho (ni wa milele)- Dhana ya muda, majira na nyakati hufanya kazi kwenye ulimwengu wa mwili PEKEE!

·         Ulimwengu wa mwili huongozwa na kutawaliwa na ulimwengu wa roho. Yaani ulimwengu wa roho ndiyo huamua nini kitokee katika ulimwengu wa mwili.

Lengo langu kukupitisha hapa ni ili kujibu baadhi ya maswali kadhaa, mojawapo ni lile Mungu alikuwa wapi wakati akifanya shughuli ya uumbaji?

Mungu alikuwa katika ulimwengu wa roho (usio na mwanzo wala mwisho, ambao huamua nini kitokee katika ulimwengu wa mwili) wakati akiumba dunia na vitu vyote viijazavyo (yaani ulimwengu wa mwili). Sasa pointi ya msingi nitamaniyo ujifunze hapa ni ile yenye swali kuwa Kwanini Mungu aliamua kwa utashi wake mwenyewe kumpa mwanadamu kuitawala dunia? Hii ni kwasababu mwanadamu ndiyo kiumbe pekee chenye uwezo wa kuishi na kufanya kazi katika ulimwengu wa roho na ulimwengu wa mwili kwa wakati mmoja (simultaneously). Kumbuka ufalme wa Mungu una makao makuu katika ulimwengu wa roho na matawi/mwendelezo katika ulimwengu wa mwili… Hii ni kwasababu mwanadamu ni roho yenye nafsi inayoishi ndani ya mwili (Rejea Wokovu ni Uhakika wa Maisha ya Sasa ya Baadaye uk. 12-16). Kwa ufupi kabisa hayo ndiyo maelezo ya jumla ya ufalme wa Mungu na nafasi ya mwanadamu katika huo.